گؤزلریندن سئودیم دونیانی

شئعیریده موسیقی نیده

گؤزلرین گویلركیمی درین

دنیزلر كیمی ماوی

من گوزلرینین لیمانیندایام

قالیم می ؟

یوخسانا

بویور یاناقلاریندان سوزولوم...

منه سرین باخما..

شاختا وورار منی،

سویوق آپارار منی.

منه درین باخ..

بیر باخ،

اسیرم گؤزلرینده

یازیغین گلسین منه دونورام.

باخیشیندا تیتره میشدی اوره ییم،

غورورومو سایمادیم

توشدوم تورپاغا

اوره ییمی قاپیندا هارایلادیم،

سایمادین

گونشی پای وئرمه دین،

دوندوم...

نییه گلمه دین

من سنه نه دئدیم آی اوره گی داش؟

اولمادین کؤنلومون سیررینا سیرداش

هیجرینده قان اولدو گؤزلریمده یاش

سن منیم گؤزومده ن قانی سیلمه دین

سنه سئوگی دئدیم ، سنه یار دئدیم

سنله قیشیم اولار نوباهار دئدیم

قالماز اوره گیمده آه، زار دئدیم

حاییف سن منی بیله، بیلمه دین

داغلارین زیروه سین دومان قار آلدی

سنسیز اوره گیمده غم یووا سالدی

شیمشگم گؤزلریم یوللاردا قالدی

بیر دؤنه گؤروشه نییه گلمه دین؟

داریخمیشام

داریخمیشام

بیر آیریلیقا، بیر گونه، بیر سنه

تکجه سنه

سنی سئودیم....آیریلدین

گؤزلریندن بیر باخیش.... وئرمه دین

ائله بیل بیر دنیزیدین

غرق ائتدین منی

بیر تک گؤزلریندن ایتدیم...باتدیم...گؤرمه دین منی

داریخمیشام...سنه یوخ

داریخمالی گونلریمه

گؤزلریم دولدو-دولدو

ائله بیل بیر دنیز پاتلاندی

سؤیله دیم داریخمیشام

سنه یوخ!!!

دیلدن آخان سؤزلرینه

یازیق اولسون

گؤرمه دیم بیر وفاسیز اللرینی

آی منیم سئودیجه ییم

داریخمیشام

سنه یوخ

سنی سئودیگیم گونومه!

سن سیزلیك اینان مادیم بئله گله جگ

سن گئده جك سن

ایشیم بئله گله جگ...

یوخ اولمامیش تور اولاجاقسان

دوره می تورلا هوره جكسن.

اینان مادیم گونوم بئله گله جگ..

بیلمیره م اوره گیم نه ایچون سئویر سنی

سنده منی سئویرسن می ؟

اللرین

اللریمده ن نه ده ن کوسوب بیلمیره م

قورخویا بورونن دوداقلارین

دوداقلاریما یالوارماقدادیر

ایشغال اولموش اوره گینده ن ائشیدیره م

سئو گی کورپوسونون سینان سسین

قوندارما

گوزیاشلاریندا ایزی قالسادا

عشق نه دئمکدیر

کیلپیکلرین سیلمکده دیر

باخیشلارین گل - گل دئییر

دانیشقلارین دایان دئییر

یاخینلاردان اوزاقلاردان ائشیدیره م

هله سن منی سئویرسن

آما

سون دفعه اعتراف ائدیره م

داها

ایچیمده سنه یالواراماق ایسته میره م

منیمکی‌سن!

سنه گیزلی بیر سؤزوم وار

اوره‌ییمده گیزلتمیشم؛

نه واختانسا

گیزلتمکدیر ایشیم، پئشم.

هارا گئتسن

آرخان بویو هئی سورونور گؤزوم منیم؛

یامان سؤزدور

اوره‌ییمده گیزلتدیییم سؤزوم منیم.

کؤنول دئییر : گل سیرری آچ!

آنجاق نئیلیم

اوره‌ک اوزلو، دیل اوتانقاچ.

بیلیرسنمی؟

سنه گیزلی بیر سؤزوم وار

بیلمیر هئچ کس.

من دئمه‌میش

اونو دویسان،

اونو بیلسن

منیمکی‌سن،

منیمکی‌سن!