منه بیر کوچه باغیشلا!

تام دنیزه آچیلسین گؤزو

مارتیلار کئچسین خیالیندان

سحر- آخشام ...

و اوزاقدان گلن

گمی لرین سسی ایله

دؤیونسون اوره یی.

منه بیر کوچه باغیشلا!

یولچولارین،

آیاق سسی ایله اویانسین

ماهنی سسی ایله اویناسین

و بیر سئودا خیالی ایله

اویوسون...

منه بیر کوچه باغیشلا!

گؤزلریندن،

اوره یینه

کؤچه بیله جه ییم

بیر کوچه...

من آغلامیرام کی

غورورون تیکانی باتیب گؤزومه

داریخمیرام دا هئچ

تکجه اؤلومون دوداغیندان قاییدیرام

اونودا اؤپنمیرم

یازین سون گئجه سی دی

آیین قیسیرلیغیندا قویلورام سویوق تنیمه

سئوگیلریمی

اؤزلم سرین بیر آه دوغور

اوشودور، دونداریر صاباحلاریمی

بیر اولدوز آخیر باخ

گئجه نین قارا اوزونه

من آغلامیرامکی....

الینه الیم دیینده ...

سؤیودلر باشین اییه نده

 سنه من یاریم دئیینده 

 سانارام دونیا منیمدیر 

گوزونه گوزوم دیینده ... الینه الیم دیینده ...

سن واریدین

هر شی واریدی

بیلیردیم گؤزللیک نه دیر، سئوینج نه

سن اوچوب گئتدین

هر شی سنین له اوچوب گئتدی

من ده اوچدوم

کناریندا یوخ

تک باشیما

قوشلار کیمی یوخ

دووارلار کیمی