ساچلاریما قؤنان قار, سنه بنزه ییر

دؤیمادان ارییب آخدین آووجومدان...

بیر چتیرآلتیندا

بیر آخشام اوستولوک یاغیش ایسته ییرم

بیردنه ده چتیر !

سن...من... و -

بیر اوزون خیابان ...،

اطرافیندا رقص ائده ائده سوزولن یاغیش دامجیلاری.

سونرا لئی سان بیر یاغیش .

ائله یاغسین کی باشماقیمیزین دالیجا-

گوله-گوله قاچاق،

بیخیلاق...دوراق. 

ایسلاناق یاغیش آلتیندا .

یئنی دن قاییداق... 

قارانلیق باییز آخشامی،

او اوزون خیابانی...،

ایکیمیز بیر چتیرآلتیندا .

الی بوش گئتمه..

گئدیرسن ال بوش گئتمه

گوتور بواورکده کی اوتدان

بیر اووج کوز

ساخلا اوزونله او کوزو

او سویوق یئرلرده

ایسسیتسین

اورگینی گوتوردویون کوز

تبریز؛

بوز باغلاییب یئنه ده...

سئرچه لر- پیشیک لر

و، خیاواندا قزئته ساتان قوجا کیشی

اوشویور...

اللریم دونوب.

آیاقلاریم زویولده ییر،

ییخیلیرام بیردن.

و سن،

بو اورتامدا دئییرسن؛

" منیم قادینیم اولارسان می؟"...

(ملیحه عزیزپور)