قارلی کوچه ده

گئدیب قاییتمایان آیاق ایزلری

سنی یادیما سالیر

سنی...

اوزاد الینی

سون نفه سه بیر آددیم قالمیشکن

اوزاد

آل یورقون اؤزونو سویوق قوجاغینا

سیل اؤگی کؤلگه لرین ایزینی

آلیشدیر وارلیغین آتشینی

یان , یاخیل

کؤزوندن دوغ گئنه سنی

سئو سنی

سن سئو

یئنیدن سای

سای آددیملارینی نفس نفس 

بیر, ایکی ...

(راضیه افتخاری)

من بیر بولود

سن بیر گونش

گونش‌له یاغیش بیر یاتاقدا یاتماییب

بعضن گؤزل‌لیگین نفعینه قیراغا چکیلمک گرک

آرزولاری بوراخدیم

گئدیرم کی گله سن

یئر- گؤی سئوگیسی دیر بیزیم سئوگیمیز

نئجه بولوت یاغار قارا توپراغا!

قارا یئرده نه وار؟ هئچ بیر شئی، بولوت

ایستکسیز باشلایار یئره یاغماغا

من همن بولوتام، سنسه قارا یئر

نه سنده سئوگی وار، نه منده ایستک

سانما سئودالینام یاغیرام سنه!

یالنیز چون بولوتام یاغماغیم گره ک