اؤتور گؤروشمه یین واختی ، وعده سی

فیکریمدن بیر آجی گومان اؤتوشور.

قوپور ایچه ریمده اینیلتی سسی

عشقیمین سوناسی دومانا دوشور.

جاوابسیز سوواللار باش – باشا چاتیر

گؤره سن سئوگیلیم عهدینی داندی؟

اولمایا قلبینی اونودوب آتیر

بس نییه گلمه دی ، نییه یوباندی؟

گلدییی یوللاری قاریش با قاریش

باخیشیم ایزله ییر، گؤزوم آختاریر.

آنجاق جاوابلانمیر سونسوز آختاریش

دؤزوموم اؤزونه دؤزوم آختاریر.